ଇରାନର ତେଲ ଜାହାଜଗୁଡ଼ିକୁ ଅନ୍ୟ ଦେଶର ବୋଲି ଦର୍ଶାଇ ଚଲାଇବାରେ ସହାୟତା କରିଥିବା ଅଭିଯୋଗରେ ଆମେରିକା କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଆମେରିକା ପକ୍ଷରୁ ଭାରତ ଏବଂ ତୁର୍କୀ ସହ ଜଡ଼ିତ ମୋଟ ୯ଟି ସଂସ୍ଥା ତଥା କମ୍ପାନୀ ଉପରେ ପ୍ରତିବନ୍ଧକ ଲଗାଯାଇଛି ।ବୁଧବାର ଆମେରିକୀୟ ଅର୍ଥ ବିଭାଗ (US Department of the Treasury) ଏହି ପ୍ରତିବନ୍ଧକଗୁଡ଼ିକର ଘୋଷଣା କରିଛି। ଏହି ପ୍ରତିବନ୍ଧକଗୁଡ଼ିକ ଚଣ୍ଡୀଗଡ଼ର ସୁନୀଲ କୁମାର ଶର୍ମା ଏବଂ ତାଙ୍କ ପତ୍ନୀ ଜସପ୍ରୀତ ପ୍ରୀତି ଶାହିଦଙ୍କ ଉପରେ ଲଗାଯାଇଛି। ସେମାନଙ୍କ ଉପରେ ଏଭଳି ଏକ ନେଟୱର୍କ ଚଳାଉଥିବାର ଅଭିଯୋଗ ରହିଛି, ଯାହାକି ଇରାନୀ ପେଟ୍ରୋଲିୟମ ବୋହି ନେଉଥିବା ଜାହାଜଗୁଡ଼ିକୁ ଜାଲ ପଞ୍ଜୀକରଣ ଏବଂ ପ୍ରମାଣପତ୍ର ଯାଗାତ ଯୋଗାଇ ଦେଉଥିଲା।
ସୁନୀଲ କୁମାର ଶର୍ମା ଏବଂ ତାଙ୍କ ପତ୍ନୀଙ୍କ ବ୍ୟତୀତ ଅନ୍ୟ ଦୁଇ ଜଣ ଭାରତୀୟ ନାଗରିକ ଅଶ୍ୱନୀ କୁମାର ଧୀମାନ ଏବଂ ଈଶ୍ୱରବିନ୍ଦ୍ର ସିଂହଙ୍କ ଉପରେ ମଧ୍ୟ ପ୍ରତିବନ୍ଧକ ଲଗାଯାଇଛି। ସେମାନଙ୍କ ଉପରେ ଅଭିଯୋଗ ରହିଛି ଯେ ସେମାନେ ଏହି ଦମ୍ପତିଙ୍କ ସହ ଜଡ଼ିତ କମ୍ପାନୀଗୁଡ଼ିକରେ ନିର୍ଦ୍ଦେଶକ ଭାବରେ ସାମିଲ ଥିଲେ। ଏହି କାର୍ଯ୍ୟାନୁଷ୍ଠାନରେ ଭାରତ ସହିତ ଜଡ଼ିତ ନଅଟି ସଂସ୍ଥା (entities) ର ନାମ ସାମିଲ ଅଛି।କେବଳ ଭାରତ ନୁହେଁ, ତୁର୍କୀର ‘ଫୁଗୋ ଗ୍ରାଉଣ୍ଡ ସର୍ଭିସେସ୍ ଇଙ୍କ୍’ ନାମକ ଏକ କମ୍ପାନୀ ଉପରେ ମଧ୍ୟ ଆମେରିକା କଡ଼ା ପଦକ୍ଷେପ ନେଇଛି । ଏହି କମ୍ପାନୀ ଉପରେ ଇରାନର ୬ଟି ପ୍ରତିବନ୍ଧକପ୍ରାପ୍ତ ଏୟାରଲାଇନ୍ସକୁ ଯେପରିକି ଇରାନ ଏୟାର ଟୁର୍, ସାହା ଏୟାରଲାଇନ୍ସ, ସେପେହରାନ ଏୟାରଲାଇନ୍ସ ଇତ୍ୟାଦି ବିମାନବନ୍ଦରରେ ଜରୁରୀ ଜମିଗତ ସେବା ଯୋଗାଇଦେଉଥିବା ଅଭିଯୋଗ ରହିଛି ।
