ଚଳିତ ବର୍ଷ ପାଇଁ ଆଉ ବାତ୍ୟାର ପୂର୍ବାନୁମାନ କରିନାହିଁ IMD (ଭାରତୀୟ ପାଣିପାଗ ବିଭାଗ)। ଏବର୍ଷ ଏଯାଏଁ ୩ଟି ବାତ୍ୟା ଆସିଥିବା ବେଳେ ବର୍ଷକୁ ହାରାହାରି ପ୍ରାୟ ୫ଟି ବାତ୍ୟା ସୃଷ୍ଟି ହୋଇଥାଏ ବୋଲି ସୂଚନା ଦେଇଛନ୍ତି IMD ଡିଜି ମୃତ୍ୟୁଞ୍ଜୟ ମହାପାତ୍ର।ଅକ୍ଟୋବର, ନଭେମ୍ବର, ଡିସେମ୍ବରରେ ପ୍ରାୟ ୫ଟି ବାତ୍ୟା ଆସିଥାଏ। ଏଯାବତ୍ ବଙ୍ଗୋପସାଗରରେ ୩ଟି ବାତ୍ୟା ସୃଷ୍ଟି ହୋଇ ସାରିଲାଣି। ୧୯୮୭ ମସିହା ପରେ ଆମେ ଏପରି ସ୍ଥିତିକୁ ସାମ୍ନା କରିଛୁ। ଷ୍ଟ୍ରଙ୍ଗ ଏଲନିନୋ ପାଇଁ ଏପରି ହେଲା ବୋଲି କୁହାଯାଇପାରିବ ବୋଲି କହିଛନ୍ତି ମୃତ୍ୟୁଞ୍ଜୟ ମହାପାତ୍ର। ଆଜିଠାରୁ ପାଗ ଶୁଖିଲା ରହିବ । ତେଣୁ ଲଗାଣ ବର୍ଷା ପରେ ରାଜ୍ୟବାସୀଙ୍କୁ ମିଳିପାରେ ଆଶ୍ୱସ୍ତି। ଏଲ୍-ନିନୋ ବର୍ଷରେ ବାତ୍ୟା କମ୍ ଆସେ ବୋଲି ପାଣିପାଗ ବିଜ୍ଞାନୀମାନେ ଯେଉଁ ଆକଳନ କରୁଥିଲେ, ଚଳିତ ବର୍ଷ ତାହା ସମ୍ପୂର୍ଣ୍ଣ ଓଲଟପାଲଟ ହୋଇଯାଇଛି । ଗୋଟିଏ ପଟେ ପ୍ରଶାସନର ଆଗୁଆ ପଦକ୍ଷେପ ଯୋଗୁଁ ବଡ଼ ଧରଣର ଜୀବନହାନିକୁ ରୋକାଯାଇପାରିଛି, କିନ୍ତୁ ଅନ୍ୟପଟେ ଲଗାତାର ତିନୋଟି ପ୍ରାକୃତିକ ବିପର୍ଯ୍ୟୟ ଚାଷୀ, ଛାତ୍ରଛାତ୍ରୀ ଏବଂ ରାଜ୍ୟ ଅର୍ଥନୀତିକୁ ପଛକୁ ଠେଲି ଦେଇଛି । ଜଳବାୟୁ ପରିବର୍ତ୍ତନର ଏହି ସଙ୍କେତ ଆଗାମୀ ଦିନରେ ଓଡ଼ିଶା ପାଇଁ ଏକ ବଡ଼ ଚ୍ୟାଲେଞ୍ଜ ସୃଷ୍ଟି କରିବାକୁ ଯାଉଛି ।






