ମୁମ୍ବାଇର ଏକ ପାର୍କରେ ଘଟିଛି ଅଭାବନୀୟ ଘଟଣା । ବୁଲିବାକୁ ଯାଇଥିବା ଏକ ପ୍ରେମୀଯୁଗଳଙ୍କୁ ଘେରିଗଲେ ୮ରୁ ୧୦ ଜଣ ନାବାଳକ। ପ୍ରଥମେ ଅଶ୍ଳୀଳ ମନ୍ତବ୍ୟ, ଆଉ ଏହାର ପ୍ରତିବାଦ କରିବାରୁ ଆରମ୍ଭ କରିଦେଲେ ମାଡ଼ । ଏପରିକି ଯୁବତୀଙ୍କ ମୁଣ୍ଡକୁ କାଠ ଓ ବାଡ଼ିରେ ଆକ୍ରମଣ କରିବାକୁ ମଧ୍ୟ ପଛାଇଲେ ନାହିଁ । ଦମ୍ପତି ଏହାର ପ୍ରତିବାଦ କରିବାରୁ ପରିସ୍ଥିତି ଉତ୍ତେଜନାପୂର୍ଣ୍ଣ ହୋଇପଡ଼ିଥିଲା। ନାବାଳକମାନେ ଉଭୟଙ୍କୁ ଘେରିଯାଇ ଆକ୍ରମଣ କରିଥିବା ଅଭିଯୋଗ ହୋଇଛି।ଭାଇରାଲ୍ ଭିଡିଓରେ ଦମ୍ପତିଙ୍କ ସହ ବାଳକମାନଙ୍କ ଯୁକ୍ତିତର୍କ ଦେଖିବାକୁ ମିଳୁଛି। ଏପରିକି ଜଣେ ବାଳକ ଯୁବକଙ୍କୁ ଚପଲରେ ଆଘାତ କରୁଥିବା ବେଳେ ଅନ୍ୟ ଜଣେ ଯୁବତୀଙ୍କ ମୁଣ୍ଡକୁ ବାଡ଼ିରେ ଆଘାତ କରୁଥିବା ଦୃଶ୍ୟ ରହିଛି। ଘଟଣାସ୍ଥଳରେ ଥିବା କିଛି ଲୋକ ଏହି ଘଟଣାର ଭିଡିଓ ରେକର୍ଡ କରିଥିଲେ। ପରେ ଏହା ସୋସିଆଲ ମିଡିଆରେ ପ୍ରସାରିତ ହୋଇଥିଲା।ଘଟଣାଟି ମୁମ୍ବାଇର କୁର୍ଲା ପଶ୍ଚିମ ଅଞ୍ଚଳର ପ୍ରମୋଦ ମହାଜନ ଉଦ୍ୟାନର । ଭିଡିଓ ଭାଇରାଲ୍ ହେବା ପରେ ପୋଲିସ ୮ ଜଣ ନାବାଳକଙ୍କ ବିରୋଧରେ ଏଫ୍ଆଇଆର୍ କରିଛି। ୫ ଜଣଙ୍କ ଅଭିଭାବକଙ୍କୁ ନୋଟିସ୍ ମଧ୍ୟ ଜାରି ହୋଇଛି । ଅନ୍ୟପଟେ ବିଜେପି ନେତା କିରିଟ ସୋମାୟା ଏହି ଘଟଣାକୁ ନେଇ ଧର୍ମୀୟ ଆଧାରରେ ମନ୍ତବ୍ୟ ଦେଇଛନ୍ତି । ତେବେ ଘଟଣାର ପ୍ରକୃତ ତଥ୍ୟ ପୋଲିସ ତଦନ୍ତରୁ ସ୍ପଷ୍ଟ ହେବ ।କିନ୍ତୁ ଏଠାରେ ବଡ଼ ପ୍ରଶ୍ନ ହେଉଛି, ଏତେ କମ୍ ବୟସରେ ପିଲାମାନଙ୍କ ମନରେ ହିଂସା କାହିଁକି? କାହିଁକି ନିଜ ଭୁଲ୍କୁ ସ୍ୱୀକାର କରିବା ବଦଳରେ ଆକ୍ରମଣର ରାସ୍ତା ବାଛୁଛନ୍ତି?






