ମଣିପୁରର ଚାଣ୍ଡେଲ ଜିଲ୍ଲାରେ ମଦ ପିଇବା ପରେ ଅତିକମରେ ୧୫ ଜଣଙ୍କର ମୃତ୍ୟୁ ଘଟିଛି। ୧୮୦ରୁ ଅଧିକ ଲୋକଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ଏହି ପରିସ୍ଥିତିକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନ ଏକ ଆଡଭାଇଜରି ଜାରି କରିଛି।ମୁଖ୍ୟମନ୍ତ୍ରୀ ଖେମଚାନ୍ଦ ସିଂହ ଘଟଣାର ତଦନ୍ତ ରିପୋର୍ଟ ମାଗିବା ସହ ଚିକିତ୍ସା ବ୍ୟବସ୍ଥାର ସମୀକ୍ଷା କରିଛନ୍ତି ।ଅନ୍ୟପଟେ, ପରିସ୍ଥିତିର ଗମ୍ଭୀରତାକୁ ଦେଖି ଏକ ଡାକ୍ତରୀ ଟିମ୍ ଚାନ୍ଦେଲ ଜିଲ୍ଲାର ବିଭିନ୍ନ ଗାଁକୁ ଯାଇଛନ୍ତି । ଏହି ଟିମ୍ରେ ଡାକ୍ତର, ମେଡିକାଲ ଷ୍ଟାଫ୍ ଓ ଆବଶ୍ୟକୀୟ ଔଷଧ ରହିଛି । ବିଷାକ୍ତ ମଦ ପିଇ ଅସୁସ୍ଥ ହୋଇଥିବା ଲୋକଙ୍କ ସ୍ୱାସ୍ଥ୍ୟବସ୍ଥା ଯାଞ୍ଚ କରିବା ସହ ଅଧିକ ଚିକିତ୍ସା ଆବଶ୍ୟକ ଥିବା ରୋଗୀଙ୍କୁ ହସ୍ପିଟାଲ ପଠାଯାଉଛି ।ମୁଖ୍ୟମନ୍ତ୍ରୀ ଏହି ଘଟଣାକୁ ଅତ୍ୟନ୍ତ ଦୁଃଖଦ ଓ ଅଭାବନୀୟ ବୋଲି କହିଛନ୍ତି । ଏହା ପଛରେ ଯେଉଁମାନଙ୍କର ସମ୍ପୃକ୍ତି ଥିବ, ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ହେବ ବୋଲି ସେ ସ୍ପଷ୍ଟ କରିଛନ୍ତି । ତେବେ ମଦରେ କେଉଁ ବିଷାକ୍ତ ପଦାର୍ଥ ମିଶିଥିଲା ଏବଂ ଏହା କେଉଁଠାରୁ ଆସିଥିଲା, ତାହା ତଦନ୍ତ ପରେ ଜଣାପଡ଼ିବ ।ଚାଣ୍ଡେଲ ଜିଲ୍ଲା ପୋଲିସ କହିଛି- ପୀଡ଼ିତମାନେ ପିଇଥିବା କଥିତ ମଦ କାକଚିଙ୍ଗ ଜିଲ୍ଲାର ସୁଗନୁ ଅଞ୍ଚଳରୁ ଅଣାଯାଇଥିଲା। ଆଡଭାଇଜରିରେ କୁହାଯାଇଛି ଯେ ମଦ୍ୟପାନ କରିବା ପରେ ଯଦି ବାନ୍ତି, ପେଟ ଯନ୍ତ୍ରଣା, ମୁଣ୍ଡ ବିନ୍ଧା, ମୁଣ୍ଡ ବୁଲାଇବା, ଦୃଷ୍ଟି ଝାପ୍ସା କିମ୍ବା ନିଶ୍ୱାସ ନେବାରେ କଷ୍ଟ ଭଳି ଲକ୍ଷଣ ଦେଖାଯାଏ, ତେବେ ତୁରନ୍ତ ଡାକ୍ତରୀ ସହାୟତା ନିଅନ୍ତୁ।






