ସରକାରୀ ପାଣ୍ଠିରୁ ୧ କୋଟି ୨୩ ଲକ୍ଷରୁ ଅଧିକ ଟଙ୍କା ଆତ୍ମସାତ ଅଭିଯୋଗରେ ବରିଷ୍ଠ ସହାୟକ ଗିରଫ । ସାତକୋଶିଆ ବନ୍ୟପ୍ରାଣୀ ଡିଭିଜନର ବରିଷ୍ଠ ସହାୟକ ଅଜୟ କୁମାର ନାଏକଙ୍କୁ ଗିରଫ କଲା ଭିଜିଲାନ୍ସ । ଗତ ଅକ୍ଟୋବରରୁ ସେ ଫେରାର ଥିଲେ । ଏଚ୍ ଆର୍ ଏମ୍ ଏସ୍ ପୋର୍ଟାଲରେ ଜାଲ୍ ବିଲ୍ ପ୍ରସ୍ତୁତ କରି ଅଜୟ ନାୟକ୧ କୋଟି ୨୩ ଲକ୍ଷ ୫୨ ହଜାର ୫୪୭ ଟଙ୍କା ହଡ଼ପ କରିଥିବା ଅଭିଯୋଗ ହୋଇଥିଲା ।ଖବର ଅନୁଯାୟୀ, ଅଜୟ ସତକୋଶିଆ ବନଖଣ୍ଡର DFO କାର୍ଯ୍ୟାଳୟର ପ୍ରତିଷ୍ଠାନ ବିଭାଗରେ ବରିଷ୍ଠ ସହାୟକ ଭାବେ କାର୍ଯ୍ୟରତ ଥିଲେ। କର୍ମଚାରୀଙ୍କ ଦରମା, ଅବ୍ୟବହୃତ ଛୁଟି ବାବଦ ପ୍ରାପ୍ୟ ଏବଂ ବକେୟା ଅର୍ଥ ପ୍ରଦାନ ଦାୟିତ୍ୱ ତାଙ୍କ ଉପରେ ଥିଲା।ଏହି ସୁଯୋଗରେ ସେ ୨୦୧୯ ଜାନୁଆରୀ ୧ରୁ ୨୦୨୫ ଜୁନ୍ ୩୦ ମଧ୍ୟରେ ଅବସରପ୍ରାପ୍ତ ଓ ମୃତ କର୍ମଚାରୀଙ୍କ ନାଁରେ HRMS ପୋର୍ଟାଲରେ ଜାଲ୍ ବିଲ୍ ପ୍ରସ୍ତୁତ କରିଥିଲେ। ଏହି ଟଙ୍କା ପ୍ରକୃତ ହିତାଧିକାରୀଙ୍କ ଖାତାକୁ ନଯାଇ ନିଜ ବ୍ୟାଙ୍କ ଖାତା ସହ ଅନ୍ୟ ଦୁଇ ଜଣ ସହଯୋଗୀଙ୍କ ଖାତାକୁ NEFT ମାଧ୍ୟମରେ ଟ୍ରାନ୍ସଫର କରାଯାଇଥିବା ଭିଜିଲାନ୍ସ ତଦନ୍ତରୁ ଜଣାପଡ଼ିଛି।ଗତ ଅକ୍ଟୋବର ମାସରୁ ଅଜୟ ଫେରାର ଥିଲେ। ତାଙ୍କ ଗତିବିଧି ଉପରେ ନଜର ରଖିଥିବା ଭିଜିଲାନ୍ସ ଟିମ୍ ଗତକାଲି ରାତିରେ ଅନୁଗୁଳ ସହରରେ ଏକ କାର୍ ରେ ଘରକୁ ଯାଉଥିବା ବେଳେ ତାଙ୍କୁ କାବୁ କରିଥିଲା।ଏହି ଘଟଣାରେ କଟକ ଭିଜିଲାନ୍ସ ଥାନାରେ ଏକ ମାମଲା ରୁଜୁ ହୋଇଛି । ଦୁର୍ନୀତି ନିବାରଣ ଆଇନ ଓ ବିଏନ୍ ଏସ୍ ର ବିଭିନ୍ନ ଧାରାରେ ମାମଲା ରୁଜୁ କରି ଅଭିଯୁକ୍ତଙ୍କୁ ଆଜି କୋର୍ଟ ଚାଲାଣ କରାଯିବ ବୋଲି ଭିଜିଲାନ୍ସ ପକ୍ଷରୁ କୁହାଯାଇଛି ।






