ଭାରତର ଭିସା ବ୍ୟବସ୍ଥାରେ ବଡ଼ ପରିବର୍ତ୍ତନ । ବିଦେଶୀ ନାଗରିକଙ୍କ ପାଇଁ ଭିସା ଆବେଦନ ପ୍ରକ୍ରିୟାକୁ ଅଧିକ ସରଳ ଓ ସୁବିଧାଜନକ କରିବାକୁ କେନ୍ଦ୍ର ସରକାର ଆଣିଛନ୍ତି ନୂଆ ସଂସ୍କାର ।ଗୃହ ମନ୍ତ୍ରାଳୟ ଦ୍ୱାରା ନିଆଯାଇଥିବା ଏହି ପଦକ୍ଷେପ ଅନାବଶ୍ୟକ କାଗଜପତ୍ର କାମକୁ କମାଇବା ସହ ଭିସା ବର୍ଗଗୁଡ଼ିକୁ ଅନ୍ତର୍ଜାତୀୟ ମାନଦଣ୍ଡ ଅନୁଯାୟୀ ବ୍ୟବସ୍ଥିତ କରିଛି। ଭିସା ବ୍ୟବସ୍ଥାରେ ହୋଇଥିବା ମୁଖ୍ୟ ପରିବର୍ତ୍ତନ ଗୁଡିକ ହେଉଛି, ଭିସା ବର୍ଗ ହ୍ରାସ। ଗୃହ ମନ୍ତ୍ରାଳୟ ମୁଖ୍ୟ ଭିସା ବର୍ଗ ସଂଖ୍ୟାକୁ ୧୩ରୁ ୯କୁ କମାଇ ଦେଇଛି। ସେହିପରି ଆବେଦନକାରୀଙ୍କ ସୁବିଧା ପାଇଁ ଉପ-ବର୍ଗ ସଂଖ୍ୟାକୁ ମଧ୍ୟ ୪୯ରୁ ୨୩କୁ ହ୍ରାସ କରାଯାଇଛି। ଦ୍ବିତୀୟରେ ହେଲା ଛୋଟ ଆବେଦନ ଫର୍ମ। ସମସ୍ତ ୨୩ଟି ଭିସା ଉପ-ବର୍ଗରେ ଆବଶ୍ୟକ ହେଉଥିବା ତଥ୍ୟ ଏବଂ କଲମ୍ ସଂଖ୍ୟାକୁ ୬୫% ରୁ ୭୦% ପର୍ଯ୍ୟନ୍ତ କମାଇ ଦିଆଯାଇଛି।
ଆବେଦନ ପ୍ରକ୍ରିୟାକୁ ଶୀଘ୍ର କରିବା ପାଇଁ ନିଜ ଦେଶର ଜିଲ୍ଲା ନାଁ ଦେବା ଭଳି ଅନାବଶ୍ୟକ ପ୍ରଶ୍ନଗୁଡ଼ିକୁ ହଟାଇ ଦିଆଯାଇଛି। ତୃତୀୟରେ ସରଳ ମେଡିକାଲ ଭିସା। ପାରମ୍ପରିକ ଚିକିତ୍ସା- M-1 ଭିସା ଏବଂ ଆୟୁଷ ଚିକିତ୍ସା- M-3 ଭିସା ପାଇଁ ଅଲଗା ଅଲଗା ବ୍ୟବସ୍ଥା ରହିଛି। ଏହି ଦୁଇଟି ଭିସା ଏବଂ ଏହାର ଇ-ଭିସା ବିକଳ୍ପ ଏବେ ଗୋଟିଏ ବର୍ଷ ପାଇଁ ଏକାଧିକ ଥର ପ୍ରବେଶ ସୁବିଧା ସହ ମିଳୁଛି। ରୋଗୀଙ୍କ ସହାୟକମାନଙ୍କ ପାଇଁ M-2 ଏବଂ M-4 ଭିସା ମଧ୍ୟ ବଜାୟ ରହିଛି।ନୂଆ ବ୍ୟବସ୍ଥାରେ ଛାତ୍ର, ଗବେଷକ, ବ୍ୟବସାୟୀ ଓ ଚିକିତ୍ସା ପାଇଁ ଭାରତ ଆସୁଥିବା ବିଦେଶୀ ନାଗରିକଙ୍କୁ ଅଧିକ ସୁବିଧା ମିଳିବ। ରିସର୍ଚ୍ଚ ଭିସା ପାଇଁ ଆବଶ୍ୟକ କାଗଜପତ୍ର ମଧ୍ୟ କମିବ । ଏହାସହ ବ୍ୟବସାୟ ଓ ନିବେଶକୁ ପ୍ରୋତ୍ସାହନ ଦେବା ପାଇଁ ଦୀର୍ଘକାଳୀନ ଭିଜିଟର୍ ଭିସାର ବ୍ୟବସ୍ଥା ମଧ୍ୟ ରହିଛି ।ତେବେ ଆଇଟି ବ୍ୟବସ୍ଥାର ଅପଗ୍ରେଡ୍ କାମ ଶେଷ ହେବା ପରେ ୨୦୨୬ ଡିସେମ୍ବର ଶେଷ ସୁଦ୍ଧା ନୂଆ ଭିସା ବ୍ୟବସ୍ଥା ସମ୍ପୂର୍ଣ୍ଣ ଭାବେ ଲାଗୁ କରିବା ଯୋଜନା ରହିଛି ।
