କୋର୍ଟଙ୍କ ନିର୍ଦ୍ଦେଶକୁ ବେଖାତିର କରି ବିଳମ୍ବିତ ରାତି ଯାଏଁ ଲୋକ ବାଣ ଫୁଟାଇଲେ । ଆଉ ତାସହ ବାୟୁ ପ୍ରଦୂଷଣ ଏବଂ ଶବ୍ଦକୁ ନିମନ୍ତ୍ରଣ କଲେ । ଦେଶର ରାଜଧାନୀ ଦିଲ୍ଲୀରୁ ଆରମ୍ଭ କରି ରାଜ୍ୟର ରାଜଧାନୀ ଭୁବନେଶ୍ବର ପର୍ଯ୍ୟନ୍ତ ନିୟମକୁ ଉଲ୍ଲଂଘନ କରି ପ୍ରଚୁର ଆତିଶବାଜି ଓ ବାଣ ଫୁଟାଯାଇଛି। ଭୁବନେଶ୍ୱରରେ ପ୍ରଦୂଷଣର ସାଂଘାତିକ ସ୍ଥିତି, କଟକ ସମେତ ଅନ୍ୟ ସହରର ବାୟୁର ମାନକୁ ନେଇ ଚିନ୍ତା । ପରିକି ଦୀପାବଳି ରାତିରେ ଦେଶର ସର୍ବାଧିକ ପ୍ରଦୂଷିତ ସହରଗୁଡ଼ିକ ମଧ୍ୟରେ ଭୁବନେଶ୍ୱର ସ୍ଥାନ ପାଇଥିଲା । AQI.inର ତଥ୍ୟ ଅନୁସାରେ ଗତକାଲି ରାତି ୯ଟାରେ ଭୁବନେଶ୍ୱରର ବାୟୁ ଗୁଣବତ୍ତା ସୂଚକାଙ୍କ ବା AQI ୧୦୯୧ରେ ପହଞ୍ଚିଥିଲା । ରାତି ସାଢ଼େ ୯ଟା ବେଳକୁ ଏହା ବଢ଼ି ୧୨୫୪ ହୋଇଥିଲା । ଫଳରେ ସେହି ସମୟରେ ଦେଶର ତୃତୀୟ ସର୍ବାଧିକ ପ୍ରଦୂଷିତ ସହର ପାଲଟିଥିଲା ଭୁବନେଶ୍ୱର। ଏହି ପ୍ଲାଟଫର୍ମରେ ବାୟୁର ମାନକୁ ‘ବିପଜ୍ଜନକ’ ଶ୍ରେଣୀରେ ରଖାଯାଇଥିଲା । ଦୀପାବଳି ଦିନ ଦିଲ୍ଲୀର ହାରାହାରି ଏୟାର କ୍ୱାଲିଟି ଇଣ୍ଡେକ୍ସ ବିପଦଜନକ ସ୍ତରରେ ପହଞ୍ଚି ଯାଇଥିଲା । ଦିଲ୍ଲୀର ଅନେକ ସ୍ଥାନରେ ବାଣ ଧୂଆଁ ଯୋଗୁଁ ଭିଜିବିଲିଟି ବହୁତ କମିଯାଇଥିଲା। ରାସ୍ତାଘାଟରେ ଷ୍ଟ୍ରିଟ୍ ଲାଇଟ୍ ଆଲୋକରେ ଧୂଆଁ ସ୍ପଷ୍ଟ ଭାବେ ନଜର ଆସୁଥିଲା।ତେବେ ପ୍ରଦୂଷଣ ନିୟନ୍ତ୍ରଣ ପାଇଁ ଦିଲ୍ଲୀ ସରକାର ପ୍ରାୟ ୩୫୦ଟି ଦଳ ଗଠନ କରିଥିବା କଥା କହିଥିଲେ ମଧ୍ୟ, ସ୍ଥିର ସମୟ ପରେ ମଧ୍ୟ ବାଣ ଫୁଟିବା ବନ୍ଦ ହୋଇନଥିଲା। ପ୍ରଦୂଷଣ ବୃଦ୍ଧି ଯୋଗୁଁ ଶ୍ବାସରୋଗୀ, ହୃଦ୍ ରୋଗୀ, ଶିଶୁ ଏବଂ ବୟସ୍କ ଲୋକଙ୍କ ସ୍ବାସ୍ଥ୍ୟ ଉପରେ ଗମ୍ଭୀର ପ୍ରଭାବ ପଡ଼ିବା ଆଶଙ୍କା ରହିଛି।
